बुढीनन्दा नगरपालिका–७, सेरकाटिया दलित बस्तीमा खानेपानीको समस्या भएको छ । २०५० सालमा निर्माण भएको भैँसापानी प्याउना खानेपानी योजनाले बस्तीमा पानी सुविधा दिएको थियो ।
पछिल्लो समय उक्त खानेपानी योजनाको मर्मतसम्भार नहुँदा पाइपलाइन फुटेर बिग्रिँदै गएपछि खानेपानीको अभाव भएको हो । परिवारको सङ्ख्या धेरै र खानेपानीको धारा कम भएको र धारा पनि बिग्रिँदै गएपछि दलित बस्तीमा खानेपानी समस्या देखिएको स्थानीय जसवीर विकले बताए ।
उहाँका अनुसार गाउँमा पानीका धेरै धारा छन्, पानी भने कहिल्यै नआउने गरेकाले ६० घरपरिवारलाई खानेपानीको अभाव झेल्नु परेको हो । सरकारले ‘एक घर एक धारा’ निर्माण गरे पनि पानी नआउने गरेको गुनासो स्थानीयको छ । गाउँघर सरसफाइ अभियानसँगै दलित बस्तीका सबै परिवारले घर घरमा शौचालय निर्माण गरेका छन् । घरको अगाडि निर्माण गरेका खानेपानीको धारामा पानी नआउँदा ती शौचालयसमेत फोहोर बन्न थालेको विक बताउछन ।
गाई, भैँसीका लागि खोलाको पानी भए पनि स्थानीयलाई पिउनयोग्य सफा खानेपानीको अभाव देखिएको छ । थानीय दलबहादुर विक भन्छन, “घर घरमा धारा त छन् तर पानी आउँदैन ।” बाजुराका धेरै गाउँबस्तीमा पानीको मुहान नहुँदा खानेपानीको समस्या हुने गरेको छ तर यो दलित बस्तीको माथि खानेपानीका मुहान प्रशस्त रहेका छन् । मर्मतसम्भार गर्न नसक्दा यस्तो समस्या आएको बताइन्छ । उक्त बस्तीमा खानेपानी मर्मतसम्भारका लागि तीन पटक रकम विनियोजन गरेको वडाध्यक्ष अशोकबहादुर दानीले बताए।
सम्बन्धित वर्गका समाचारहरू
