महिलाले नेतृत्व गरेको हुप्सेकोट गाउँपालिकाले छोरी जन्मे ५ हजार रुपैयाँ दिने कार्यक्रम ल्याएको छ । आगामी वर्षदेखि लागू हुने गरी छोरी जन्मे खातामा ५ हजार रुपैयाँ राख्दिने तथा दूध बेच्ने किसानलाई प्रतिलिटर ५ रुपैयाँ अनुदान थप्ने गाउँपालिकाले जनाएको छ । 

गाउँपालिका अध्यक्षमा लक्ष्मी पाण्डे र उपाध्यक्षमा स्वतन्त्र कोपिला मल्ल गरी दुवै जना महिला छन् । छोरी जन्मिए जन्मदर्ताका आधारमा बैंक खाता खोलेर तत्काल ५ हजार रुपैयाँ जम्मा हुने व्यवस्था मिलाइएको अध्यक्ष पाण्डेले बताइन् ।

एक वर्षको अवधिमा १ सय २० छोरी जन्मन सक्ने आकलनमा ६ लाख बजेट विनियोजन गरिएको छ । यसलाई छोरीको सुनौलो भविश्य कार्यक्रम नाम दिइएको छ । गाउँपालिकाले गत वर्षदेखि नै प्रतिसुत्केरी ५ हजार नगद पोषणबापत दिँदै आएको छ । यसलाई पनि निरन्तरता दिइएको छ ।