यातायात व्यवस्था कार्यालय र सेवा कार्यालयमा हुने दर्ता र नवीकरणमा जरिवाना छुट गर्ने सुदूरपश्चिम प्रदेश सरकारले निर्णय गरेको छ । यातायात व्यवस्था कार्यालय कैलाली, कञ्चनपुर, सेवा कार्यालय डोटी र डडेल्धुरामा हुने दर्ता र नवीकरणमा छुट दिने निर्णय गरिएको हो । 

आर्थिक मामिला मन्त्रालयको मन्त्री स्तरीय बैठकले निषेधाज्ञा अवधिमा छुट दिने निर्णय भएको हो । निषेधाज्ञाकै समयमा कर बुझाउने अवधि पुगेका सवारी धनीहरुलाई सवारी साधन पूर्णरुपमा खुलको १५ दिनभित्र कर बुझाउँदा जरिवाना छुट गर्ने निर्णय गरिएको मन्त्रालयका शाखा अधिकृत खगेन्द्र साउँदले जानकारी दिए । 

मन्त्रालयले निर्णय कार्यान्वयनका लागि भौतिक पूर्वाधार विकास मन्त्रालयलाई पत्र पठाएको छ भने यातायात व्यवस्था कार्यालय र सेवा कार्यालयलाई पनि जानकारी गराइएको छ ।