कैलालीमा ट्रकमा हायस (उईङगर) ठोक्किँदा १६ जना घाइते भएका छन् । जिल्लाको गोदावरी नगरपालिका वडा नं. १ स्थित पाठक पेट्रोल पम्पनजिकै धनगढी–अत्तरिया ६ लेन सडकमा रोकिएको ट्रकको पछाडिको भागमा हायस ठोक्किँदा हायसमा सवार १६ जना घाइते भएका हुन ।
इलाका प्रहरी कार्यालय मालाखेतीका अनुसार अत्तरियाबाट धनगढीतर्फ गइरहेको सु.प.प्र ०२ ००१ ख ११६६ नम्बरको हायस रोकिएर राखेको अवस्थामा रहेको ना ४ ख १९१५ नम्बरको ट्रकको पछाडि ठोक्किएको हो ।
दुर्घटनामा घाइते १६ जना मध्ये १४ जना सामान्य रहेको र हायसका चालक र एक जना महिलालाई मध्यम चोट लागेको प्रहरीले जनाएको छ । घाईतेहरुमध्ये केहीको धनगढीस्थित माया मेट्रो हस्पिटल र केहीको अत्तरियास्थित पद्मा अस्पतालमा उपचार भइरहेको बताइएको छ ।
ट्रक नियन्त्रणमा रहेको तथा ट्रक चालक फरार रहेकाले खोजी कार्य जारी रहेको इलाका प्रहरी कार्यालय मालाखेतीले जनाएको छ ।
सम्बन्धित वर्गका समाचारहरू
