भारतले पठाएको बेलुनसहितको उपकरण दार्चुलाको नौगाडमा झरेको छ । उपकरणसहित भेटिएपछि यो शंकाको विषय बनेको छ । दार्चुलाको नौगाड गाउँपालिकाको ढामडेरामा बेलुन सहितको उपकरण भेटिएको हो । त्यसमा मौसम विज्ञान केन्द्र देहरादुन लेखिएको छ ।

भारतले मौसम सम्बन्धि तथ्यांक संकलनका लागि बेलुन पठाएको बुझिएको दार्चुलाका प्रमुख जिल्ला अधिकारी दिर्घराज उपाध्यायले बताए । ‘ बेलुनमा एउटा उपकरण राखेको अवस्थामा भेटिएको थियो,’ उनले भने, ‘त्यो भारतले मौसम सम्बन्धि तथ्यांक संकलनको लागि पठाएको भन्ने बुझिएको छ ।’

‘यसअघि पनि पठाउने रहेछन्, हावा कम भएपछि बेलुन झरेको हो,’ उनले भने, ‘मौसम सम्बन्धि तथ्यांक संकलनका लागि भए त ठिकै हो, अन्य प्रयोजनको लागि पनि हुनसक्छ, प्राविधिकसँग सल्लाह गरिरहेका छौं ।’