डडेल्धुरा - डडेल्धुरामा परेको असिना पानीले हिउँदे बालीमा क्षति पुर्‍याएको छ । जिल्लाको अमरगढी नगरपालिका वडा नम्बर ८ र ९ मा आइतबार दिउँसोदेखि परेको असिना पानीले गाउँमा लगाइएको हिउँदे बाली सखाप पारेको हो । 

गहुँ, तरकारी र फलफूल खेती असिनाले नष्ट गरेपछि स्थानीय चिन्तित भएका छन् । झरीसँगै लगातारको असिनापानीले कृषकहरूको पाक्नै लागेको बालीमा क्षति भएको स्थानीय पारश पन्तले बताए । आइतबारको असिना पानीले सुदूरपश्चिम प्रदेशका पहाडी जिल्लाहरू डोटी, अछाम र बाजुरालगायतका धेरै स्थानमा ठूलो क्षति भए पनि विवरण भने आइसकेको छैन ।