धनगढीमा लकडाउन उल्लङघन गरी सवारी साधन चलाउने एक सय ३५ जनालाई दुई घण्टा घाममै उभ्याएर सजाय दिईएको छ । जिल्ला प्रहरी कार्यालय कैलालीले धनगढीका विभिन्न स्थानमा लकडाउनको उल्लङ्घन गरी सवारी चलाई रहेका एक सय ३५ जनालाई दुई घण्टा सडकमा उभ्याएर कारवाही गरेको हो ।

उनीहरुलाई सडकमै दुई घण्टा घाममा उभ्याएर उनीहरुका सवारी साधन पनि नियन्त्रणमा लिईएको हो । लकडाउन उल्लंघन गर्नेहरुलाई दुई घण्टा सडकमा उभ्याएर छोडिएको जिल्ला प्रहरी कार्यालयका प्रवक्ता प्रहरी नायब उपरिक्षक दक्षकुमार बस्नेतले जानकारी दिए । लकडाउनमै चलाईएका एक सय एक सवारी साधन पनि नियन्त्रणमा लिईएको छ ।

मोटरसाईकल, स्कुटर तथा विद्युतीय रिक्सा लगायतका एक सय एक सवारी साधन नियन्त्रणमा लिईएको प्रहरीले जनाएको छ ।  बुधबार पनि लकडाउनको उल्लङ्घन गरी चलाईएका दुई सय ९२ सवारी साधन नियन्त्रणमा लिएको थियो भने तीन सय १९ जनालाई सडमै उभ्याईएको थियो ।

लकडाउनको वेवास्ता गर्दै सवारी साधन चलाएको आरोपमा नियन्त्रणमा लिएका व्यक्ती र सवारी साधनलाई दुई घण्टापछि छोडेको छ । उनीहरुलाई आगामी दिनमा उल्लंघन नगर्ने सर्तमा छोडेको प्रवक्ता बस्नेतले बताए ।