संयुक्त राष्ट्र संघकाे शान्ति मिसनमा गएका सैनिकहरू अशान्त भइदिँदा बिरानो मुलुक कंगोमा सैनिक जवानहरू आफ्नै कमान्डरबाट निर्घात कुटिएका छन् ।
कंगो मिसनमा खटिएका नेपाली सेनाका जवान सहसेनानीबाट निर्घात कुटिएका हुन् । कुटिएकामध्ये एक सेनाको शरीरमा गम्भीर नीलडाम छ ।
ज्वाला गणबाट कंगोको शान्ति मिसनमा गएका सैनिक जवान नवराज माझी ०७७ असोज ८ गते राति ३ सहसेनानीबाट निर्घात कुटिएका हुन् । विदेशी भूमिमा आफ्नै सैनिक कुटेर बहादुरी देखाउने ३ सहसेनानी हुन्– इन्द्र थापा, सुभास हुमागाई र योगेन्द्र धिताल । कुटिएका माझीको शरीरमा गहिरो नीलडाम भए पनि कुटिएका अन्य सैनिक जवानहरूमा भने त्यस्तो नदेखिएको स्रोतले जनाएको छ ।
सहायक रथी तथा सैनिक प्रवक्ता सन्तोषवल्लब पौड्यालले २०७७ असाेज ८ गते बिहीबार राति भएको घटनाबारे जानकारी प्राप्त भएको साँघुसँग बताए । सैनिक जवानहरूले होहल्ला गरेर मर्यादा नाघ्दा वादविवाद भएको जानकारी भए पनि छानविनपछि मात्र यकिन हुने उनले जानकारी दिए । ‘घटनाबारे जानकारी आएको छ । मर्यादा नाघेर होहल्ला गर्दा वावविवाद भएको भन्ने छ । फोटो पनि सार्वजनिक भएको छ । छानबिनपछि मात्र त्यहाँ के भएको के हो भनेर यकिनसाथ भन्न सकिन्छ छ,’ कंगोमा सैनिक जवान कुटिएको घटनाबारे राखेको जिज्ञासामा प्रवक्ता पौड्यालले भने ।
सुरु भयो कोर्ट अफ इन्क्वायरी
घटनाबारे प्रधानसेनापति पूर्णचन्द्र थापालगायतलाई भोलिपल्ट नै जानकारी गराइएको थियो । यसबारे जानकारी पाएलगत्तै प्रधानसेनापति थापाले अनुसन्धान गर्न निर्देशन दिएका छन् ।
सैनिक प्रवक्ता पौड्यालका अनुसार, घटनासँग सम्बन्धित व्यक्तिसँग कोर्ट अफ इन्क्वायरी थालिएको छ । कोर्ट अफ इन्क्वायरीले घटनाबारे छानबिन गरेर प्रतिवेदन दिएपछि सत्यतथ्य बाहिर आउने उनले बताए । ‘छानबिनले दोषी देखाएका व्यक्तिलाई सैनिक ऐन अनुसार कारबाही हुन्छ,’ प्रवक्ता पौडेलले भने ।-साँघुबाट
सम्बन्धित वर्गका समाचारहरू
