सुदूरपश्चिम प्रदेशमा थप ५६ जनामा कोरोना संक्रमण पुष्टि भएको छ । सेती प्रादेशिक अस्पताल, डडेल्धुरा अस्पताल, जिल्ला अस्पताल बझाङ, डोटी र अछामको कमलबजार नगरपालिकाको प्रयोगशालामा गरी ५ वटा प्रयोगशालामा ३ सय ७७ जनाको परीक्षण गर्दा थप ५६ जनामा कोरोना पुष्टि भएको हो । पछिल्लो २४ घण्टामा ३ सय ७७ जनाको परीक्षण गर्दा थप ५६ जनामा संक्रमण पुष्टि भएको सामाजिक विकास मन्त्रालयका प्रवक्ता नरेन्द्र कार्कीले जानकारी दिए ।
सेती प्रादेशिक अस्पताल प्रयोगशालामा पछिल्लो २४ घण्टामा १ सय ९५ जनाको परीक्षण गर्दा ३६ जनामा संक्रमण पुष्टि भएको उनले बताए । अस्पतालका सूचना अधिकारी दिलिपकुमार श्रेष्ठले धनगढी उप–महानगरपालिकाका १९ जनामा संक्रमण देखिएको जानकारी दिए । उनका अनुसार उप–महानगरपालिकाको वडा नम्बर ५ का ९ जना, वडा नम्बर २ का ५ जना, वडा नम्बर १ का २ जना, यस्तै वडा नम्बर ३, ७ र १२ का एकरएक जनामा संक्रमण पुष्टि भएको हो । कैलालीकै गोदावरी नगरपालिकाका ५ जना र लम्किचुहा नगरपालिकाका ४ जनामा समेत कोरोना पुष्टि भएको सूचना अधिकारी श्रेष्ठले बताए ।
यस्तै कञ्चनपुरको भीमदत्त नगरपालिकाका २ जना, यस्तै बेलौरी नगरपालिका, कृष्णपुर नगरपालिका र वेदकोट नगरपालिकाका १, १ जनामा समेत कोरोना पुष्टि भएको छ । उता डडेल्धुराका २ जना र डोटीको केआईसिह गाउँपालिका–६ का एक जनामा पनि संक्रमण पुष्टि भएको सूचना अधिकारी श्रेष्ठले जानकारी दिए ।
यस्तै, जिल्ला अस्पताल बझाङमा ६७ जनाको परीक्षण गर्दा १० जना, डडेल्धुरा अस्पताल प्रयोगशालामा ५३ जनाको परीक्षण गर्दा ८ जना र जिल्ला अस्पताल डोटी प्रयोगशालामा २२ जनाको परीक्षण गर्दा २ जनामा संक्रमण पुष्टि भएको सामाजिक विकास मन्त्रालयका प्रवक्ता कार्कीले बताए ।
कमलबजार नगरपालिकाको प्रयोगशालामा १५ जनाको परीक्षण गरेपनि सबैको रिर्पोट नेगेटिभ आएको छ । यो सँगै सुदूरपश्चिममा कोरोना संक्रमितको संख्या १० हजार ६ सय ५२ पुगेको छ । प्रदेशभर संक्रमण पुष्टि भएका झण्डै ८ हजार ५ सय जनाले कोरोना जितेका छन् भने ४२ जनाको मृत्यु भएको छ ।
सम्बन्धित वर्गका समाचारहरू
