कैलालीमा आफ्नै साथीको हत्या गर्ने एक जना पक्राउ परेका छन्।  कैलारी गाउँपालिका वडा नम्बर  ४ के गाउँका ३९ वर्षीय सोम बहादुर बस्नेत पक्राउ परेका हुन्।  ईलाका प्रहरी कार्यालय लम्कीबाट खटिएको प्रहरी टोलीले सोही ठाउँ स्थित बिरेन्द्र सामुदायीक बनमा लुकिछिपी बसेको उनलाई पक्राउ गरेको हो। 

उनले गत २४ गते सोमबार लम्कीचुहा नगरपालिका वडा नम्बर  २ मोतिपुर स्थित पदमबहादुर बुढा क्षेत्रीको मिनि पक्की घरमा  डेरा कोठा गरी बस्दै आएका ज्याला मजदुरीको काम गर्ने धनगढिका ३६ वर्षीय बिशाल बुढाथोकीको हत्या गरेको प्रहरीले जनाएको छ। घटना अनुसन्धान गर्दै जाने क्रममा घटना पश्चात भागी फरार भएका उनीसँगै डेरा कोठामा बस्ने सोमबहादुरलाई पक्राउ गरेको हो। 

प्रारम्भिक अनुसन्धानको क्रममा  २३ गते आइतबार बेलुकी मृतक बिशाल बुढाथोकीसंगै सोमबहादुर बस्नेतले स्थानीय बजार र  डेरा कोठामा बसि घरेलु मदिरा सेवन गरी दुबै जनाबीच बादविवाद हुदाँ फलामको कर्नीले टाउँकोमा हिर्काएको प्रहरीले जनाएको छ।  सोही चोटका कारण बिशाल बुढाथोकीको मृत्यु भएको  प्रहरी अनुसन्धानबाट खुलेको छ। 

घटनास्थलबाट कर्नी समेत बरामद गरी घटना सम्बन्धमा थप अनुसन्धान कार्य भई रहेको प्रहरीले जिल्ला प्रहरी कार्यालय कैलालीका प्रवक्ता तथा प्रहरी नायव उपरिक्षक प्रतिक विष्टले बताए।