जिल्ला प्रहरी कार्यालय कैलालीबाट प्रहरी उपरीक्षक अनुपम शमशेर जवराको सरुवा भएपछि उनको स्थानमा विश्व अधिकारी आएका छ्न्। जवराको राष्ट्रिय प्रहरी प्रशिक्षण प्रतिष्ठान महाराजगञ्जमा सरुवा भएकोमा प्रहरी प्रधान कार्यालय सुरक्षा सेवा व्यवस्थापन निर्देशनालय अंगरक्षक गण नक्सालमा कार्यरत एसपी अधिकारी कैलाली प्रहरीको कमाण्ड सम्हाल्न आएका हुन्।

एसपी अधिकारी बुधवार कैलाली पुगेका  हुन्। अधिकारी प्रहरी संगठनभित्र सफल प्रहरी अधिकारीका रुपमा परिचित छन्।  उनी प्रहरी नायव उपरीक्षक हुँदा कञ्चनपुरमा पनि बसेका थिए। त्यसपछि एसपीमा बढुवा भएर मोरङ प्रहरीको नेतृत्व सम्हालेका एसपी अधिकारी अपराध नियन्त्रण गर्दै समाजमा शान्ति स्थापना गराउने तथा द्धन्द्ध व्यवस्थापनको सवालमा सफल थिए।

प्रहरी संगठनभित्र सबैलाई समान व्यवहार गर्ने उनले मोरङमा रहँदा नागरिक-प्रहरी सम्बन्ध सुधारमा धेरै समय खर्चिएका थिए।  बौद्धिक प्रहरी अधिकृत भनेर चिनिने अधिकारी प्रहरी संगठनमा दुरगामी र सकारात्मक प्रभाव पार्ने नयाँनयाँ अभियानको सिर्जना गर्ने क्षमता राख्छन्।

विभिन्न जघन्य अपराधलाई अनुसन्धान गरी टुँगोमा पुर्याउन सफल भएकै कारण एसपी अधिकारीलाई अपराध अनुसन्धानमा अब्बल प्रहरी अधिकृतका रुपमा चिनिन्छन्।