कैलालीमा अन्तरजातीय विवाह गरेर जङ्गलमा बसेको जोडी घर पुग्ने बितिक्कै युवतीका आफन्तले उनीहरूमाथि आक्रमण गरेका छन् । अन्तरजातीय विवाह गरेका कैलालीको भजनी नगरपालिका ७ का प्रकाश विश्वकर्मा र मालती रावल २१ दिन पछि जङ्गलबाट घर पुगेका थिए ।

घर पुगेका उनीहरूमाथि युवतीका आफन्तले आक्रमण गरेको भजनी नगरपालिकाकी उप-प्रमुख छायादेवी देवकोटाले बताइन् ।युवतीका आफन्तले जबरजस्ती मालतीलाई लगेको उनले बताइन् । उप- प्रमुख देवकोटाले भनिन्, ‘उनीहरु जङ्गलबाट घर आएपछि युवतीका आफन्तले आक्रमण गरेको खबर पाएँ । अहिले युवतीका आफन्तले युवतीलाई लगेका छन् । युवक भने आफ्नै बुबासँग छन् । हामीले प्रहरी प्रशासनलाई पनि खबर गरेका छौं । अब सबैलाई एकै ठाउमा बोलाएर छलफल गर्नेछौँ ।’

ती जोडीले सामाजिक सञ्जाल मार्फत आफुहरुलाई ज्यान मार्ने धम्कि आएकाले जङ्गलमा लुक्न बाध्य भएको जानकारी दिएका थिए ।