डोटीको बडिकेदार गाउँपालिकाको एम्बुलेन्सले भारतबाट फर्किएका नागरिकलाई ओसार्न थालेपछि स्थानीय बासिन्दा आक्रोसित बनेका छन् । रोजगारीका लागि भारत गएका नागरिकलाई से १ झ २८१ नम्बरको एम्बुलेन्समा यात्रु भित्र्याउँदा कोरोनाको त्रास फैलिएको भन्दै स्थानीय बासिन्दाले विरोध गरेका हुन् ।
अमेरिकामा बस्दै आएका नेपालीको सहयोगमा डोटीका काङ्ग्रेस नेता आनन्द विष्टको पहलमा आमा फाउण्डेसनले गाउँपालिकालाई एम्बुलेन्स प्रदान गरेको हो । एम्बुलेन्समा दैनिक यात्रु ओसारिँदा सम्बन्धित निकायले कुनै चासो नदेखाएको स्थानीयको आरोप छ । गाउँपालिकाका स्वास्थ्य संयोजक योगेन्द्र शाहीले एम्बुलेन्समा यात्रु बोकेको विषयमा छानबिन गरी दोषी देखिए कानुनी कारबाही गरिने बताए । उनले भने, ‘बिरामी बोक्ने एम्बुलेन्समा यात्रु बोक्नु गलत हो । यात्रु बोकेको प्रमाणित भए कानुन बमोजिम कारबाहीका लागि सिफारिस गछौँ ।’
एम्बुलेन्स चालक राम बडैलाले भने आफ्नो गाउँपालिकाका उपाध्यक्ष ईन्द्रा भाट र वडा नम्बर ४ का अध्यक्ष वीरेन्द्र कोडकेनीको आदेशमा यात्रु बोकेको बताए । भारतबाट फर्किएका गाउँपालिकाका नागरिक नबोके जागिर खाइदिन्छु भन्दै वडा अध्यक्षले एम्बुलेन्सको चाबी खोसेपछि बाध्य भएर यात्रु बोकेको चालक बडैलाको दाबी छ ।
यस विषयमा गाउँपालिका उपाध्यक्ष ईन्द्रा भाट र वडा नं ४ का वडा अध्यक्ष वीरेन्द्र कोडकेनीसँग सम्पर्क गर्न खोज्दा सम्पर्क हुन सकेन ।
सम्बन्धित वर्गका समाचारहरू
