कैलालीमा हसिया प्रहार गरी हत्या प्रयास गर्ने तीन जनालाई प्रहरीले पक्राउ गरेको छ । गौरीगंगा नगरपालिका वडा नम्बर ६ का दिपक खड्कालाई मंगलबार राती कुटपिट गरी ज्यान मार्ने उद्देश्यले हसिया प्रहार गर्ने तीन जनालाई पक्राउ गरिएको प्रहरीले जनाएको छ ।
जिल्ला प्रहरी कार्यालयका प्रवक्ता प्रहरी नायव उपरिक्षक प्रतिक विष्टले पक्राउ पर्नेमा कैलाली गौरीगंगा नगरपालिका ६ कठौतीका २२ वर्षीय प्रकाश शाह, सोही ठाउँका २३ वर्षीय बेजन बिक र गोदावरी नगरपालिका ९ का दिपकराज जोशी रहेको बताए । उनीहरुलाई ईलाका प्रहरी कार्यालय मालाखेतीका प्रमुख प्रहरी नायव उपरिक्षक ज्ञानबहादुर विष्टको कमाण्डमा खटिएको टोलीले पक्राउ गरेको हो ।
तीनै जनाले पीडितलाई गौरीगंगा नगरपालिका ६ कै कठौतीमा लगेर कुटपिट गरी ज्यान मार्ने उद्देश्यले धारिलो हतियार प्रहार गरेर घाईते बनाएका थिए । टाउकोमा गम्भीर चोट लागेका उनलाई प्रहरी नायब उपरिक्षक विष्टकै कमाण्डको टोलीले उपचारका लागि माया मेट्रो अस्पताल धनगढीमा ल्याएकोमा उपचार सम्भव नभएपछि नेपालगञ्ज पठाएको थियो ।
घटनास्थलबाट धारिलो हतियार हसिया समेत बरामद गरिएको भने संलग्न व्यक्ती फरार रहेको अवस्थामा पक्राउ परेका हुन् । उनीहरु विरुद्ध ज्यान मार्ने उद्योग अन्तरगत मुद्दा दर्ता गरी थप अनुसन्धान भईरहेको प्रहरीले जनाएको छ ।
सम्बन्धित वर्गका समाचारहरू
