शुक्रबार राति धनगढी–अत्तरिया ६ लेन सडकखण्डअन्तर्गत गोदावरी नगरपालिका–१ स्थित मनहरा पुल नजिक गाडीको ठक्करबाट ज्यान गुमाएका युवकको हालसम्म पहिचान खुल्न सकेको छैन।

अन्दाजी २५ वर्षीय ती युवकलाई गाडीले कुल्चेर चिन्नै नसकिने अवस्था बनाएकाले सनाखत हुन नसकेको जिल्ला प्रहरी कार्यालय कैलालीले जनाएको छ। उनको शव पोष्टमार्टमका लागि सेती अस्पतालमा राखिएको कैलाली प्रहरीका प्रवक्ता प्रहरी नायब उपरीक्षक वेदप्रकाश जोशीले बताए।

उनका अनुसार मृतकलाई ठक्कर दिने गाडीको समेत पहिचान भइसकेको छैन। घटनाको अनुसन्धान भइरहेको प्रहरी नायब उपरीक्षक जोशीले बताए।