नेपाली कांग्रेसका सभापति तथा प्रधानमन्त्री शेरबहादुर देउवा सत्ता गठबन्धनबीच चुनावी तालमेल गर्न सकारात्मक देखिएपनि केन्द्रीय सदस्य सशांक कोइरालामात्र होइनन्, देउवा निकटकै अरु नेतापनि तालमेलमा अनिच्छुक देखिएका छन् ।
दार्चुलाका बिभिन्न स्थानमा आयोजित कार्यक्रमहरुमा सुदूरपश्चिमका प्रदेश सभापति बीर बहादुर बलायरले आगामी स्थानीय तहको निर्वाचनमा कांग्रेसले एक्लै चुनावमा जानुपर्ने बताएका हुन् ।
शुक्रवार दार्चुला पुगेका बलायरले सञ्चारकर्मीसँग भने, ‘मौजुदा परिस्थितिमा गठबन्धनको परिकल्पना नगरिएकाले नीतिगत रुपमा सुदूरपश्चिममा गठबन्धन हुदैन ।’
सुदूरपश्चिम प्रदेश सरकारमा कांग्रेसलाई ‘बाइपास’ गरिएकाले उनको यस्तो प्रतिकृया आएको अनुमान गरिएको छ । ‘प्रदेश सरकारको बहुमतको काँचो सोचले गर्दा नै नीतिगत आधारमा गठबन्धन गर्न नहुने देखिएको छ, सरकारलाई कांग्रेसको समर्थन छ तर सरकारमा कांग्रेसको सहभागीता छैन,’ उनले भने ।
सरकारमा सहभागि हुनेबारे गठबन्धनका अन्य शक्तिहरुले कांग्रेससँग कुनै किसिमको संवाद नगरेको भन्दै उनले असन्तुष्टिसमेत जनाएका छन् । समझदारीका साथ अगाडि बढ्यो भने आवश्यकताका आधारमा स्थानीय चुनावमा गठबन्धन गर्न सकिनेतर्फ सभापति बलायरको संकेत थियो । बलायर स्थानीय तह केन्द्रीत कार्यक्रम अन्तर्गत दार्चुला पुगेका हुन् ।
सम्बन्धित वर्गका समाचारहरू
