कञ्चनपुरमा घरदैलोमै गएर कोरोना भाइरसविरुद्धको खोप दिइँदै छ। कोरोनाविरुद्धको खोप सेवालाई प्रभावकारी बनाउन र लक्षित उमेर समूहका हरेक नागरिकलाई खोप उपलब्ध गराउन घरदैलोमै कोरोनाविरुद्धको खोप दिन लागिएको हो।

हाल भीमदत्त नगरपालिका, निड्स नेपाल, लुथरन वर्ल्ड रिलिफ एलडब्लुआर, बागेश्वरी असल शासन क्लब बास र युनिसेफको सहयोगमा भीमदत्त-९ मा कोरोनाविरुद्धको खोप अभियान जारी रहेको छ। घरायसी कार्य व्यस्तता, जनचेतनाको अभाव र अशक्तताले गर्दा खोप केन्द्र तथा स्वास्थ्य संस्थासम्म जान नसकेका र बाँकी आवश्यक मात्राको खोप लगाउने समय पुगेका नागरिकहरूलाई घुम्ती शिविरमार्फत खोप लगाउने कार्य भइरहेको भीमदत्त( ९ का वडाध्यक्ष राम नाथले बताए।

उक्त वडामा ब्रह्मदेव सहरी स्वास्थ्य केन्द्रका प्रमुख गोविन्द धामीको नेतृत्वमा स्वास्थ्यकर्मीसँगै महिला स्वास्थ्य स्वयंसेविका, स्थानीय जनप्रतिनिधि तथा सहयोगी सङ्घसंस्थाहरूका कर्मचारीको टोली परिचालन गरी खोपसँगै जनचेतना समेत प्रदान गरिएको छ।

दैनिक औसत ५० जना गरी ३०० जनालाई कोरोनाविरुद्धको खोप प्रदान गरिएको रिकोभर परियोजनाका कार्यक्रम संयोजक विनोदसिंह कडाराले बताए। रिकोभर परियोजनाले कञ्चनपुरको भीमदत्त, कृष्णपुर र पुनर्वास नगरपालिकामा विभिन्न कार्यक्रम लागु गरेको छ। यसपछि भीमदत्त नगरपालिका भित्रका अन्य विकट बस्तीमा समेत खोप अभियान सञ्चालन गरिने र परियोजना लागु भएका अन्य पालिकामा पनि उक्त अभियान विस्तार गर्ने योजना रहेको बताइएको छ।