कैलालीको घोडाघोडी नगरपालिकाका मेयर ममताप्रसाद चौधरीले पदबाट राजीनामा दिएका छन्। आसन्न स्थानीय तहको निर्वाचनमा पुनः मेयरमा उम्मेदवारी दिने भन्दै चौधरीले उपप्रमुख प्रेमकुमारी थापालाई राजीनामा बुझाएका हुन्।

उनले निर्वाचन आचारसंहिता लागु भएका कारण कामकाज गर्न नसकिने अवस्था र अगामी निर्वाचनमा पुनः उम्मेदवार बन्ने आकांक्षा भएकाले पदबाट राजीनामा दिएको बताएका छन्। एमाले कैलालीका उपसचिवसमेत रहेका चौधरी २०७४ सालमा भएको निर्वाचनमा घोडाघोडी नगरपालिकाको मेयरमा विजयी भएका थिए।

यस्तै एमालेबाट निर्वाचित घोडाघोडी नगरपालिका–१ का वडाध्यक्ष मनराज शाही, ५ का वडाध्यक्ष प्रेम रोकाया, ९ का वडाध्यक्ष कृष्ण शाहले पनि पदबाट राजीनामा दिएका छन्। यस्तै नेपाली कांग्रेसबाट विजयी वडा नम्बर ८ का अध्यक्ष भीम बोगटीले पनि राजीनामा दिएका छन्।