एमालेले आफ्नो गढ मान्दै आएको कञ्चनपुरको वेदकोट नगरपालिकामा नेपाली काँग्रेस विजयी भएको छ। ०७४ सालमा एउटा वडामा मात्र सिमित भएको काँग्रेस यसपटक मेयर उपमेयरसहित ५ वडामा विजयी भएको हो।
नगरपालिकाको मेयरमा काँग्रेसका भोजराज बोहरा विजयी भएका छन्। उनी ८०७८ मत प्राप्त गर्दै विजयी भए भने उनका प्रतिस्पर्धी एमालेकी सुशिला सिंहले ४७४० मत प्राप्त गरिन्। माओवादी र समाजवादीको गठबन्धनबाट मेयरका उम्मेदवार बनेका समाजवादीका रामचन्द्र रेग्मीले ३८९८ र राप्रपाका बमबहादुर बमले १७५१ मत पाए।
उपमेयरमा पनि काँग्रेसकै तुलशी जोशी विजयी भएकी छिन्। उनले ७२५४ मत प्राप्त गरिन्। उनकी प्रतिस्पर्धी एमालेकी पार्वती भट्टले ५७२७ मत र गठबन्धनबाट माओवादीकी हिरा जैशीले ३६५२ मत प्राप्त गरिन्। २०७४ सालको निर्वाचनमा बोहरा र जोशी एमालेका अशोक चन्द र सुशिला सिंहसँग पराजित भएका थिए।
यस्तै, गत निर्वाचनमा एक वडा मात्रै जितेको नेकपा माओवादी केन्द्रले यसपटक २ वडामा जितेको छ। नेकपा एकीकृत समाजवादीले पनि १ वडामा जित हाँसिल गरेको छ।
