धनगढी उपमहानगर नेतृत्वको बजार अनुगमन टोलीले शुक्रबार धनगढीका विभिन्न १४ वटा व्यापारिक फामको अनुगमन गरेको छ । उपमहानगरपालिकाका उपभोक्ता हित संरक्षण अधिकृत नारायणप्रसाद शर्मा नेतृत्वको बजार अनुगमन टोलीले होटल डिभोटीसहित किराना पसल, कस्मेटिक पसल, दूध डेरी, लुगा पसल, नाई पसललगायतमा अनुगमन गरेको हो ।

धनगढीको चकमेली चोक, लभली चोक, पिपल चौताराका विभिन्न व्यापारिक फर्ममा अनुगमन गरिएको उपभोक्ता हित संरक्षण अधिकृत शर्माले बताए । उनका अनुसार अनुगमनका क्रममा डिभोटी होटलमा सरफाइमा केही कमजोरी फेला परेको छ ।

होटललाई सरफाइमा ध्यान दिन भन्दै सम्झाई बुझाई गरिएको छ । किराना पसल, कस्मेटिक पसल, डेरी, लुगा पसलमा केही म्याद नाघेका सामान फेला परेको, मूल्यसूची नभएको भेटिएको अधिकृत शर्माले बताए । उपमहानगरपालिकाले अहिले बजार अनुगमनलाई तिब्रता दिएको छ ।