सुदूरपश्चिमका मुख्यमन्त्री कमलबहादुर शाह र प्रधानमन्त्री पुष्पकमल दाहाल ‘प्रचण्ड’ बिच भेटवार्ता भएको छ। सुदूरपश्चिम प्रदेशका मुख्यमन्त्रीसहितको टोलीसहित मुख्यमन्त्री शाह र प्रधानमन्त्री बिच सोमबार बिहान बालुवाटारमा भेटवार्ता भएको छ।
भेटमा सुदूरपश्चिममा मन्त्रिपरिषद् विस्तार र यहाँका विकासको योजनाबारे छलफल भएको मुख्यमन्त्री कमलबहादुर शाहले बताए। मुख्यमन्त्री शाहले प्रधानमन्त्रीज्यूसँग भेटवार्ता क्रममा मन्त्रिपरिषद् विस्तारमा धेरै ढिला भएकोले छिटो गरिदिनुस् भनेर आग्रह गरेको बताए । उनले आजै उच्च स्तरीय राजनीतिक कार्यदलमा कुरा राख्ने बताएका छन् ।
मुख्यमन्त्री शाहसँग भौतिक पूर्वाधार विकास मन्त्री प्रकाश देउवा, नेकपा माओवादी केन्द्रका संसदीय दलका नेता खगराज भट्ट, उपनेता अक्कल रावल र सांसद ओम विक्रम भाट सरल पनि बालुवाटार पुगेका थिए । मुख्यमन्त्री शाह नियुक्त भएको यही वैशाख २७ गते ३ महिना पुग्दैछ। तर ३ सदस्य रहेको मन्त्रिपरिषद् हालसम्म विस्तार हुन सकेको छैन। सरकारको नेतृत्वदेखि मन्त्रालय भागबन्डामा सत्तारुढ दलमा सकस देखिएको छ। यहाँ ७ मन्त्री, ४ राज्यमन्त्रीसहित ११ सदस्य मन्त्रीमण्डल बनाउन सकिने संवैधानिक व्यवस्था रहेको छ।
सरकारमा माओवादी केन्द्रले ३, नागरिक उन्मुक्ति पार्टीले २, मन्त्रालयमा दाबी गरेको छ। अहिले सरकारमा रहेको काँग्रेसले मुख्यमन्त्री र भौतिक पूर्वाधार विकास मन्त्रालय लिएको छ। थप १ मन्त्रालय पनि पाउनुपर्ने काँग्रेसको दाबी छ। आर्थिक मामिला मन्त्रालय पाएको नेकपा९एकीकृत समाजवादी० पार्टीले पनि थप १ मन्त्रालय पाउनुपर्ने अडानमा छ। त्यस्तै, माओवादीले २ मन्त्रालय पाउने भएको छ। २ मन्त्रालयको लागि आधा दर्जन आकाङ्क्षी छन्। माओवादीबाट संसदीय दलका नेता खगराज भट्ट, ओम विक्रम भाट सरल, झपट साउद, अक्कल रावल, रमेश धामी, शिव ओलीलगायतका मन्त्री बन्ने दौडमा छन्।
सम्बन्धित वर्गका समाचारहरू
