चौपायासँग ठोक्किएर दिनहुँ हुने सवारी दुर्घटना न्यूनीकरण गर्न कैलालीमा विशेष अभियान थालिएको छ।  छाडा चौपायाका कारण राजमार्ग क्षेत्रमा दुर्घटना बढेपछि अत्तरियामा रहेको शिवम अटोले चौपायाको घाँटीमा राति टल्कने ( रिफ्लेक्टिभ स्टिकर) लगाउने काम सुरु गरेको हो। 

इलाका प्रहरी कार्यालय मालाखेतीको सहयोगमा अत्तरिया-धनगढी-महेन्द्रनगर सडकखण्डमा रहेका चौपायामा रिफ्लेक्टिभ स्टिकर लगाइएको शिवम् अटोका सञ्चालक कमल ओझाले बताए। उनले दिनहुँ सडक दुर्घटनाका खबर सुनेपछि आफूहरूले दुर्घटना न्यूनीकरणमा सानो भूमिका खेलेको बताए । 

इलाका प्रहरी कार्यालय मालाखेतीका प्रमुख प्रहरी नायव उपरीक्षक (डीएसपी) ज्ञानबहादुर बिष्टले रातको समय त्यसमाथि वर्षात‍्को मौसममा चौपायाहरू सुक्खा ठाउँ खोज्दै सडकमा आउने र गाडीको लाइटसमेत नजिक पुगेपछि मात्रै देखिने भएका कारण दुर्घटना बढ्दै गएको बताए।  उनले रिफ्लेक्टिभ स्टिकरले सवारी चालकलाई सचेत गराउने बताए।