मोहना नदीमा पुल निर्माण नहुदा सास्ती खेप्दै आएका कञ्चनपुरको कृष्णपुर नगरपालिका बासिन्दाका लागि स्थानीय दुई युवकले निर्माण गरेको स्काई फोल्डिङ पुल बरदान भएको छ । कैलालीको सदरमुकाम धनगढीमा निर्भर कञ्चनपुरको कृष्णपुर नगरपालिकाका अधिकांश वडाका बासिन्दाले मोहना नदीमा पुल निर्माण नहुदा निकै कठिनाई झेल्नु परेको थियो ।

रोजगारीका क्रममा बिगत १५ वर्षदेखि ओमानमा रहेका स्थानीय ज्ञान बहादुर चौधरीले तीन वर्षअघि बिदामा घर आएका बेला बर्षायाममा आवात जावत गर्न नसक्दा नदी किनारमै बिरामीको मृत्यु भएको देखे ।  त्यसपछि भने उनी चुप बसिरहन सकेन । २१ दिनको बिदामा घर आएका उनले त्यही अबधिमा आफूले ओमानमा प्रयोग गर्दै आएको स्काई फोल्डिङ प्रबिधिलाई उपयोग गरे । र साथी बिनोद भट्टसंगको साझेदारीमा १३ लाखको लागतमा स्काई फोल्डिङ ब्रिज बनाए ।

धारामा प्रयोग हुने पाईपलाई जोडेर चौधरीले पुल बनाउदा धेरैले उनको त्यो प्रबिधिलाई मजाकमा उडाए । केहीले मोहनाको बाढीले पुललाई बगाएर लैजाने दावी समेत गरे । कतिपयले केही दिनको रहर त हो भनेर उनको मिहिनेतलाई हाँसोमा उडाए । उनले कुनै प्रतिक्रिया जनाएनन । एक बर्खा कट्यो । पुल जस्ताको त्यस्तै थियो, चौधरी सम्झिन्छन्, त्यसपछि भने मान्छेहरुले कुरा काट्न छाडे ।

तर केही ईस्र्या गर्ने व्यक्तिलाई मोहना नदी पुलमा स्काई फोल्डिङ ब्रिज निर्माण भएको सह्य भएन । निर्माण गरेको केही समयपछि रातिको समयमा कसैले पुलमा आगो लगाई दिए । तर उनी बिचलित भएनन । त्यसपछि भने रातिको समयमा पुलको सुरक्षाका लागि त्यहाँ बस्ने व्यवस्था मिलाए । साथै पुलको दुबै तिर बिजुलीको व्यबस्था समेत गरे ।

धेरैका लागि ठट्टाको विषय बनेको त्यही पुलले तीन वर्षयता थुप्रै बिरामी र गर्भवती महिलाको ज्यान जोगाएको छ । बर्षायाममा मोहना नदीको बाढी घटेपछि अस्पताल पु¥याउने आसैआसमा त्यही किनारमा पर्खिदा पर्खिदै ज्यान गुमाउनका आफन्तहरुका पीडाको समेत अन्त्य भएको छ ।

ठूला गाडीहरु चलाउन नमिल्ने भएपनि अटो रिक्सा, मोटरसाईकल, साईकलले सजिलै ओहोर दोहोर गर्न सक्छन् । 
धनगढीको राजपुर र कृष्णपुरको राजघाटलाई जोड्ने स्काई फोल्डिङ पुल भएकै स्थानमा पहिले बर्षायाममा डुंगा चल्थ्यो । डुंगा चालकले प्रतिव्यक्ति भाडा २५/३० रुपैया लिन्थे । मान्छेको भीड र मोटरसाईकल सहितको भारले डुंगा दुर्घटना हुने जोखिम हुन्थ्यो । जसमा विद्यार्थीहरु समेत आवातजावत गर्थे ।
तर  पुल बनेपछि भने जोखिम घट्नुका साथै आवातजावत अत्यन्त सहज भएको कृष्णपुर नगरपालिका–१० का धन बहादुर महराले बताए ।
दुध बिक्रीका लागि धनगढी ओहोर दोहोर गर्ने किसानहरु ह्न वा कारोवारका लागि धनगढी ओहोर दोहोर गर्ने व्यवसायीहरु । धनगढीका विद्यालयमा पढ्न हरेक दिन नदी तर्ने विद्यार्थीहरु हुन वा उपचारका लागि धनगढी जान खोज्नेहरु बिरामीहरु, महराले भने, सबैलाई यो पुलले सुबिधा भएको छ ।

पुलको निर्माण गर्ने चौधरीले सवारी साधनको शुल्क स्थानीय बासिन्दाले भने बमोजिम लिने गरेको सुनाए । उनले भने, मोटरसाईकल, अटो रिक्सा र साईकल चलाउनेहरुले स्थानीय स्तरमा छलफलपछि तोकेको शुल्क लिने गरेका छौ । उनले अटो रिक्साको दोहोरो भाडा ४५ रुपैया, मोटरसाईकलको २५ र साईकलको १० रुपैया तोकिएको बताए ।

तर विद्यार्थीहरुसंग पनि शुल्क नलिने चौधरीले सुनाए । समुन्द्रमा सफल भएको स्काई फोल्डिङ प्रबिधि मोहना नदीमा असफल हुने कुरै भएन । वर्षायाममा नदीमा बगेर आउने रुखहरुले समेत पुललाई बगाउन सकेन । उनले नदी किनारको संरचना बलियो बनाएको बताए । कहीकतै सिमेण्ट वा ढलान भने गरिएको छैन । नदीमा करीव ११ फिट गहिरो पाईपहरु गाडिएका छन् । तिनै  पाईपमा टिकेको छ, स्काई फोल्डिङ ब्रिज ।

उनी प्राबिधिक  होईनन । न उनले प्राबिधिक विषय नै पढेका हुन् । गरीवीका कारण व्यवस्थापन संकायमा प्रमाण पत्र तहको पढाई पुरा गरेपछि १५ वर्षअघि कामदारका रुपमा ओमान गएका ज्ञान बहादुरले स्काई फोल्डिङ प्रबिधिमा हासिल गरेको बिज्ञता नै उनको परिवारका लागि बरदान भएको छ ।

ओमानको टोको कम्पनीमा सिनियर प्राबिधिकका रुपमा काम गरिरहेका उनले मासिक दुई लाख रुपैया पारिश्रमिक पाउछन् । उनले आफ्ना सात दाजुभाई मध्ये ६ जनालाई स्काई फोल्डिङ प्रबिधिमै पोख्त बनाएका छन् । र यबितेला सबै ओमान र दुबईमा कार्यरत छन्  ।

कोरोनाका कारण बिगत पाँच महिनादेखि घरमा बसिरहेका ज्ञान बहादुरले कोरोना नियन्त्रणमा आएपछि ओमान फर्किने सुनाए । ओमानमा पनि काम छैन । काम नभएकोले कम्पनीले २५ प्रतिशत मात्र तलव दिईरहेको छ, उनले भने, केही सहज अवस्था भएपछि उतै फर्किन्छु ।

उनले धनगढीमा आयोजित धनगढी क्रिकेट लिग र खप्तड गोल्ड कपमा स्काई फोल्डिङ प्रबिधिकै प्रयोग गरी प्याराफिट निर्माण गरेको बताए ।