सुदूरपश्चिममा पनि क्रिकेटको सट्टाबाजी बढ्दै गएको छ । अहिले सञ्चालन भईरहेको ईन्डियन प्रिमियर लिगको सट्टाबाजी बढेको प्रहरीले जनाएको छ । यसै क्रममा कैलाली प्रहरीले एक जना सट्टाबाजलाई पक्राउ गरेको छ ।

जिल्ला प्रहरी कार्यालय कैलालीका प्रवक्ता प्रतिक विष्टका अनुसार धनगढी उपमहानगरपालिका वडा नम्बर ३ का ३७ बर्षीय सट्टाबाज संजीव गुप्ता पक्राउ परेका हुन् । उनी चटकपुरमा प्रिति ट्रेडिङ्ग एण्ड सप्लायर्स सञ्चालन गर्दै आएको प्रहरीले जनाएको छ । 

संचालन भईरहेको क्रिकेट प्रतियोगिता ईन्डियन प्रिमियर लिग (आईपिएलमा) मा कुनै खेलाडी आउट भएमा, खेलाडीले रन बनाएमा, चौका छक्का भएमा, विकेट गएमा, टिमले जितेमा वा हारेमा समेत अनलाईन मार्फत रकम दाउमा लगाई धनगढी बजारकोे वडा क्षेत्रमा  विभिन्न व्यक्तीहरुलाई सट्टाबाजी खेल खेलाउने गरेको गोप्य सूचनाको आधारमा उनलाई पक्राउ गरिएको प्रवक्ता विष्टले जानकारी दिए ।

उनको साथबाट अनलाईन मार्फत सट्टाबाजी गर्न गराउन प्रयोग गरेका दुई थान मोवाईल समेत बरामद भएको छ । उनलाई कैलाली जिल्ला अदालतबाट जुवा (सट्टाबाजी) मुद्दामा म्याद थप भई थप अनुसन्धान भईरहेको जिल्ला प्रहरी कार्यालय कैलालीले जनाएको छ ।