अछाममा धारिलो हतियार प्रयोग गरी हत्या गरेको आरोपमा २ जना पक्राउ  परेका छन् । ढकारी गाउँपालिका वडा नम्बर ३ का ४१ वर्षीय नरेन्द्र बुढा र २७ वर्षीय आईते भनिने नरबहादुर बुढालाई पक्राउ गरिएको जिल्ला प्रहरी कार्यालय अछामले जनाएको छ । उनीहरुले १० गते राति ११ बजे सोही गाउँपालिका वडा नम्बर ३ स्थित चौटेखोलामा वडा नम्बर ७ बस्ने १५ वर्षीय देवेन्द्र थापा र १४ वर्षीय रुद्र थापामाथी कुटपिट गर्नुका साथै धारीलो हतियार प्रहार गरी घाइते बनाएको प्रहरीले जनाएको छ । 

धारिलो हतियार प्रहारबाट घाइते भएका देबेन्द्र थापाको उपचारको क्रममा सोही राति जिल्ला अस्पताल अछाममा मृत्यु भएको थियो भने अर्का घाइते रुद्र थापालाई थप उपचारका लागि कोहलपुर मेडिकल कलेज नेपालगञ्ज पठाइएको छ । घटनामा संलग्न प्रतिवादी नरेन्द्र बुढालाई ११ गते बिहान सोही गाउँपालिका बाजकोटबाट पक्राउ गरेको र फरार रहेका प्रतिवादी नरबहादुर बुढालाई शुक्रबार कमलबजार नगरपालिका–६ कालापोखराबाट पक्राउ गरेको प्रहरीले जनाएको छ ।

दुवै जनामाथि कर्तव्य ज्यान मुद्धामा मुद्धा दर्ता गरी थप अनुसन्धान भइरहेको प्रहरीले जानकारी दिएको छ ।