कञ्चनपुर प्रहरीले तिहार लक्षित विशेष सुरक्षा योजना लागु गरेको छ । जिल्ला प्रहरी कार्यालयका प्रवक्ता प्रहरी नायब उपरीक्षक अमरबहादुर थापाले बुधबारदेखि तिहार लक्षित सुरक्षा योजना लागु गर्दै सुरक्षा सर्तकता अपनाईएको जानकारी दिए ।  

तिहारका बेला सीमानाकामा हुनसक्ने अपराधिक गतिविधिलाई ध्यानमा राखेर निगरानी बढाईएको जानकारी दिदै प्रहरी नायब उपरीक्षक थापाले बुधबारदेखि नै तालिमप्राप्त कुकुरसहित चेकजाँच बढाईएको पनि बताए । उनका अनुसार बुधबार तालिम प्राप्त कुकुरसहित गड्डाचौकी नाका, बसपार्क लगायतका क्षेत्रमा चेकजाँच गरिएको छ ।

उनले सीमानाकाबाट तिहारका समयमा लागु औषध, पाटाका लगायतका विस्फोटक पदार्थको ओसारपासर, चोरी तस्करी नियन्त्रणका लागि तालिम प्राप्त कुकुरसहित चेकजाँच बढाईएको बताए ।