गत वर्ष कञ्चनपुरको शुक्लाफाँटा नगरपालिका ११ कलुवापुरका भण्डारी दम्पतीको हत्या भएपछि टुहुरी बनेकी बालिकाको मृत्यु भएको छ ब्लड इन्फेक्सनले गर्दा  उनको गएराती मृत्युु भएको नगर उपप्रमुख तुल्सीदेवी हमालले बताए । 

२०७६ फागुन १५ गते दिउँसो ५२ वर्षीय जयलाल भण्डारी र उनकी श्रीमती २२ वर्षीया धनादेवी भण्डारीको धारिलो हतियारको प्रयोग गरी हत्या भएको अवस्थामा घरभित्रै शव फेला परेको थियो । आमाबाबुको हत्या भएपछि उनी सात महिनाकी टुहुरी भएकी थिइन् ।

आमाबाबुको उनीहरुकै घरमा हत्या हुँदा ती बालिका टाउकोमा गम्भीर चोट लागेको अवस्थामा जिवितै फेला परेकी थिइन् । धनगढीमा उपचारपछि उनलाई मामाघरमा राखिएको थियो । त्यसपछि उनका दाइले बहिनीको पालनपोषण गर्ने भन्दै आफैसंग ल्याएका थिए ।