विद्यालयमा कार्यरत शिक्षक तथा कर्मचारीमा कोरोना भाइरस संक्रमण पुष्टि भएपछि धनगढी उप–महानगरपालिका भित्रका दर्जन बढि विद्यालय बन्द भएका छन् । कोरोना भाइरस कहरका कारण लकडाउन र त्यसपछि विभिन्न चरणमा भएको निषेध आदेशका कारण लामो समयपछि खुलेका धनगढीका दर्जन बढि विद्यालय बन्द भएका हुन् ।

धनगढी उप–महानगरपालिका वडा नम्वर १६ का अध्यक्ष लक्ष्मीनारायण चौधरीले आफ्नो वडाका सबै विद्यालय बन्द भएको जानकारी दिए । उनका अनुसार ५ वटा सामुदायिक र चार वटा नीजि विद्यालय बन्द गरिएको बताए । यस्तै धनगढीकै शारदा माध्यमिक विद्यालय, राष्ट्रिय माध्यमिक विद्यालय र धनगढी नमूना माध्यमिक विद्यालय बन्द भएका छन् ।

धनगढी नमूना माध्यमिक विद्यालयका प्रधानाध्यापक लक्ष्मणदत्त भट्टले आफ्नो विद्यालय एक साताका लागि बन्द गरिएको जानकारी दिए । धनगढी उप–महानगरपालिकाका शिक्षा अधिकृत अकवर चन्दले विद्यालय व्यवस्थापन समितिको निर्णय अनुसार विद्यालय बन्द गरिएको बताए ।