मोटरसाइकल दुर्घटनामा परेर गम्भीर घाइते भएका नेकपाका केन्दीय सदस्य तथा बैतडी जिल्ला अध्यक्ष सुरेन्द्र पालका छोरा योगेश पाललाई थप उपचारका लागि काठमाडौं लगिएको छ । आइतबार बिहान गोकुलेश्वर–गन्ना सडकखण्डको डिलाशैनी गाउँपालिका ३  झरनामा पाल दुर्घटनामा परेका थिए । जिल्ला प्रहरी कार्यालय बैतडीका प्रहरी नायव उपरीक्षक नारायणप्रसाद अधिकारीले डिलाशैनी गाउँपालिका ३ पंसेराबाट गन्ना तर्फ गइरहेका बेला पालले चलाएको बा ८० प ६५०२ मोटरसाइकल अनियन्त्रित भएर दुर्घटनामा परेको बताए ।

मोटरसाइकल सडकमै रहेको र पाल सडकबाट २ सय मिटर तल खसेको अवस्थामा फेला परेका हुन् । प्रहरी नायव उपरीक्षक अधिकारीले छाती र टाउकोमा चोट रहेका पालको अझै होस खुल्न नसकेको बताए । पाललाई माउन्टेन एयरको हेलिकप्टरमार्फत काठमाडौंस्थित ग्राण्डी अस्पतालमा थप उपचारका लागि लगिएको हो ।