कैलालीमा मोटरसाइकल र इलेक्टोनिक रिक्सा एकआपसमा ठोक्किदा भएको दुर्घटनामा २ जना घाइते भएका छन्। 

पूर्वपश्चिम राजमार्ग अन्तरगत लम्कीचुहा नगरपालिका– १ मा सुपप्र ०१००८६ ९०२७ नम्बरको मोटरसाइकल र विपरीत दिशाबाट आइरहेको  भे १ ह ११०४ नम्बरको इलेक्टोनिक रिक्सा ठोक्किदा २ जना घाइते भएको प्रहरीले जनाएको छ। 

सुदूरपश्चिम प्रदेश ट्राफिक प्रहरी कार्यालय अत्तरियाकाअनुसार दुर्घटनामा परेर मोटरसाइकल चालक लम्कीचुहा नगरपालिका १ बस्ने ५६ वर्षका देवेन्द्र तिमिल्सीना गम्भीर घाइते भएका छन्।

उनलाई थप उपचारका लागि कोहलपुर रेफर गरिएको छ।   दुर्घटनामा परेर रिक्सा चालक कञ्चनपुरको कृष्णपुर नगरपालिकाका चन्द्रदेव जोशी पनि घाइते भएका छन्।  उनको लम्कीको लालरत्न अस्पतालमा उपचार भइरहेको छ।