बैतडीका कोरोना संक्रमित युवकको सम्पर्कमा आएका ३२ प्रहरी सहित ४६ जनाको थ्रोट स्वाबको नमूना संकलन गरिएको छ । संक्रमित युवकको सम्पर्कमा आएका ३२ जना प्रहरी, जिल्ला अदालत र सरकारी वकिलको कार्यालयका कर्मचारी समेत गरी ४६ जनाको थ्रोट स्वाबको नमूना संकलन गरिएको बैतडीका कोभिड–१९ सम्पर्क व्यक्ती भुवनप्रसाद जोशीले बताए ।

संकलित नमूना परीक्षणका लागि शनिबार नै धनगढी पठाईएको छ । जिल्ला प्रहरी कार्यालयको हिरासतमा रहेका शिवनाथ गाउँपालिका २२ वर्षीय युवकमा शुक्रबार कोरोना पुष्टि भएको थियो । कर्तव्य ज्यान  मुद्दामा गत बैशाख १६ गते पक्राउ परेका युवकमा कोरोना देखिएपछि जिल्ला प्रहरी कार्यालय सिल गरिएको थियो । उनी गत चैत ६ गते भारतबाट फर्किएका थिए ।

उनलाई अहिले जिल्ला अस्पतालको आईसोलेसनमा राखिएको छ ।