धनगढीमा मोटरसाइकल दुर्घटना हुँदा एक जनाको मृत्यु भएको छ। गोदावरी नगरपालिकाको वडा नम्बर २ का ३० वर्षीय टेकबहादुर बोहराको मोटरसाइल दुर्घटना हुँदा मृत्यु भएको हो। 

६ लेन सडकअन्तर्गत उपमहानगरपालिकाको वडा नम्बर ३ चटकपुरमा पार्किङ गरी राखेको ना ४ ख ३४२५ नम्बर ट्रकसँग से ४ प ८७३ नम्बरको मोटरसाइकल ठोक्किएको जिल्ला प्रहरी कार्यालय कैलालीका प्रहरी निरीक्षक खगेन्द्र साउँदले बताए।  दुर्घटनामा घाइते भएका बोहराको सेती प्रादेशिक अस्पतालमा उपचारका क्रममा मृत्यु भएकाे उनले बताए।

मोटरसाइकल पछाडि सवार गोदावरी नगरपालिका वडा नम्बर २ कै रामबहादुर पाल घाइते छन्। उनको सेती प्रादेशिक अस्पतालमा उपचार भइरहेको छ।ट्रक चालक कञ्चनपुरको कृष्णपुर नगरपालिका वडा नम्बर ३ बस्ने २८ वर्षीय दीपक भट्टलाई प्रहरीले नियन्त्रणमा लिएको छ।