कञ्चनपुरमा जंगली हात्तीको आक्रमणमा परी एक जनाको ज्यान गएको छ । जिल्लाको लालझाडी गाउपालिका वडा नम्बर ६ ढक्का चानदेवका ४५ बर्षीय खगिराज रानाको हात्तीको आक्रमणमा परी ज्यान गएको हो ।

शनिबार राति जंगली हात्तीको आक्रमणबाट घाइते भएका रानालाई कैलालीको धनगढी स्थीत सेती प्रादेसिक अस्पतालमा पुरयाइएको थियो । रानाको अस्पतालमा उपचारका क्रममा ज्यान गएको जिल्ला प्रहरी कार्यालय कञ्चनपुरका प्रहरी नायब उपरीक्षक चक्र शाहले जानकारी दिए ।  यसैगरी जंगली हात्तीको बथानले गरेको क्षति बारे एकिन विवरण आइनसके पनि करिब ११ वटा घरमा जंगली हात्तीले क्षति पुर्याएको प्रहरी नायब उपरीक्षक शाहले बताए ।

कञ्चनपुरमा मध्यवर्ती क्षेत्रका बासिन्दा बर्षेनि हात्तीको त्रासमा बस्न बाध्य रहेका छन । यसअघि हात्तीको आक्रमणबाट दुई वर्षको अवधिमा मात्रै कञ्चनपुरको शुक्लाफाँटा नगरपालिका क्षेत्रका तीन जनाले ज्यान गुमाएका थिए ।