कैलाली - कैलालीको घोडाघोडी नगरपालिकामा देउडा हेर्न गएकी १५ वर्षीया बालिका बलात्कृत भएकी छन् । २१ भदौको राति चार जनाले सामूहिक रूपमा बलात्कार गरेको भन्दै ती बालिकाले इलाका प्रहरी कार्यालय सुखडमा जाहेरी दर्ता गराएकी छन् ।

आरोपित चार जनामध्ये तीन जनालाई पक्राउ गरेको प्रहरीले जनाएको छ । आरोपितमध्ये तीन जनालाई नियन्त्रणमा लिएर अनुसन्धान गरिरहेको इलाका प्रहरी कार्यालय सुखडका प्रहरी नायब उपरीक्षक लक्ष्मण शाहीले बताए । 

एक जना फरार रहेको प्रहरीको भनाइ छ । फरार रहेका ती पुरुषको खोजी जारी रहेको प्रहरीले जनाएको छ । प्रहरीले पक्राउ परेकाको विवरण सार्वजनिक गरेको छैन । 

काम छ भन्दै एकान्तमा बोलाइ जबरजस्ती करणी गरेको जाहेरीमा उल्लेख छ । गौरा पर्वको अवसरमा ती बालिका सुखड बजारको हेलीप्याडमा भइरहेको देउडा हेर्न गएको समयमा घटना भएको प्रहरीले बताएको छ ।