डोटीको एउटा खानेपानी योजनाको नक्कली उपभोक्ता समिति गठन गरेर काम भइरहेको पाइएको छ । आदर्श गाउँपालिका २ मा रहेको ‘साउनकाँडा बाहुनकाँडा खानेपानी आयोजना उपभोक्ता समिति’ नक्कली भएको पाइएको हो । उपभोक्ताहरुको भेला नै नबोलाएर किर्ते हस्ताक्षर गरी उपभोक्ता समिति गठन गरेर गाउँपालिकाबाट पेस्की समेत लिएर काम भईरहेको हो । धनबहादुर साउद अध्यक्ष रहेको उपभोक्ता समिति गठन गर्दा र वडा कार्यालयसँग सम्झौताको कागज बनाउँदा समेत कसैको पनि उपस्थित नगराएको स्थानीयको गुनासो रहेको छ । समिति जेठ १२ गतेका दिन गठन गरिएको छ ।
२०७६ साल फागुन महिनामा सबै उपभोक्ताहरुको उपस्थितिमा कुलप्रसाद ओझाको अध्यक्षतामा सोही योजनाको समिति गठन भइसकेको भए पनि उक्त समितिसँग सम्झौता नै नगरी गोप्य रुपमा जेठमा आएर अर्को समिति गठन भएर काम अगाडि बढाएको कुलप्रसाद ओझाले बताए । ‘हामीहरुलाई कुनै किसिमको जानकारी नगराईकनै समिति गठन गरेर काम भईरहेको छ’, ओझाले भने, ‘सबै कागजात नक्कली बनाइएका छन्, हस्ताक्षर किर्ते गरिएको छ ।’‘अर्कै सडकको योजनाको समितिमा उपस्थित भएकाहरुको हस्ताक्षर सहितको कागजलाई ल्याएर खानेपानी समितिको फाइलमा राखेर उपस्थिति देखाएको छ’ अर्का उपभोक्ता नवराज ओझाले भने, ‘वडा अध्यक्ष लगायतको मिलेमतोमा काम अगाडि बढेको हो, यो कुरा उपभोक्ताहरु कसैलाई थाहा छैन ।’
तीन लाख रकम रहेको योजनाको ७५ हजार पेस्की लिएर काम अगाडि बढाइसकेका छन् । समितिका अध्यक्ष धनबहादुर साउँदले गठन प्रक्रिया नक्कली भएको स्वीकार गरि सकेका छन् । ‘समिति गठन गर्दा नक्कली काम भएकै हो’ साउदले भने ‘एक दुई जनासँग मौखिक सल्लाह गर्दा हुन्छ भने, मैले पनि काम अगाडी बढाए, यस्तो होला भनेर थाहा पाएन ।’ सबै नक्कली कागजात मिलाएर सहयोग स्थानीय तिर्थ रौतेडाले गरिदिएको अध्यक्ष साउदले बताए । अब भने सबैको सल्लाहमा मात्रै बाँकी काम अगाडी बढाउने उनले बताए ।
उता वडा अध्यक्ष रामबहादुर बोहराले भने त्यसमा आफ्नो कुनै संलग्नता नरहेको जिकिर गरेका छन । ‘सडकको समितिको माइन्युटलाई ल्याएर यो समितिमा उपस्थिति जनाएका रहेछन’ अध्यक्ष बोहराले भने, ‘नमिल्ने काम भएको छ, नक्कली प्रक्रियाबाट उपभोक्ता समिति गठन भएको छ, हामीहरु छानबिन गरेर अगाडी बढ्छौं ।’ अहिले काम रोकिएको र पेस्की अनुसारको काम भए नभएको हेरेर यदि भएको छैन् भने समितिबाट असुल उपर गर्ने समेत अध्यक्ष बोहराले बताए । समिति नक्कली बनाएर पेस्की लिएका हुन भने छानबिन गर्छौ, काम समेत रोक्छौं आदर्श गाउँपालिकाका प्रमुख प्रशासकीय अधिकृत सुरत परियारले बताए । उनले आफुलाई अहिलेसम्म सो सम्बन्धमा कुनै जानकारी नआएको बताए ।
सम्बन्धित वर्गका समाचारहरू
