कैलालीमा युवकको हत्या गरेको आरोपमा चार जना पक्राउ परेका छन् । घोडाघोडी नगरपालिका वडा नम्बर १ का २२ वर्षीय गोविन्द सापकोटाको हत्या आरोपमा चार जनालाई पक्राउ गरिएको प्रहरीले जनाएको छ ।

ईलाका प्रहरी कार्यालय सुख्खडका अनुसार पक्राउ पर्नेमा घोडाघोडी नगरपालिका १ का २० वर्षीय मिलन ऐर, २१ वर्षीय सागर बोहरा, ३२ वर्षीय प्रभात चौधरी र वडा नम्बर ३ का २२ वर्षीय विक्रम बिष्ट रहेका छन । सापकोटा गत जेठमा घोडाघोडी नगरपालिका ८ मा पर्ने करुवा खोलामा मृत भेटिएका थिए ।

मृतककी आमाले दिएको किटानी जाहेरीका आधारमा उनीहरुलाई पक्राउ गरिएको ईलाका प्रहरी कार्यालय सुख्खडका प्रमुख प्रहरी निरिक्षक हरीशरण भट्टले बताए । घटनाको अनुसन्धान भईरहेको प्रहरीले जनाएको छ ।