चितवनमा मृत्यु भएका कैलालीका कोरोना संक्रमितको शव व्यवस्थापन गरिएको छ । भरतपुरको नेपाल सेनाको कालीबहादुर गणको टोलीले मृतक पुरुषको शव व्यवस्थापन गरेको हो । आफन्तको उपस्थितिमा शव भरतपुर महानगरपालिका १ स्थित वागेश्वरी जंगलमा गाडिएको छ ।
कैलालीको गोदावरी नगरपालिका ७ का ५० वर्षीय पुरुषको भरतपुर अस्पतालको आईसीयूमा उपचारको क्रममा शनिवार बिहान ७ बजे मृत्यु भएको थियो । ७ महिना अघिदेखि फोक्सोको क्यान्सर भएका उनको भरतपुर अस्पतालको कोभिड–१९ आईसीयूमा जटिल अवस्थामा उपचारको क्रममा मृत्यु भएको अस्पतालका कोभिड–१९ क्लिनिकल संयोजक एवम् वरिष्ठ फिजिसियन डाक्टर प्रमोद पौडेलले जानकारी दिए ।
उनका अनुसार मृतक पुरूष भारतमा फोक्सोको क्यान्सरको उपचार गराएर एक महिना अघि घर फर्किएका थिए । चारपटक केमोथेरापी समेत लगाएका थिए । खकारमा रगत देखा पर्ने, ज्वरो आउने र श्वासप्रश्वासमा समस्या देखिएको थियो । स्वास्थ्यमा समस्या देखिएपछि स्थानीय अस्पतालमा समेत उपचार सम्भव नभएपछि असार १० गते चितवन मेडिकल कलेजमा आइसोलेसन वार्डमा राखेर उपचार शुरू गरिएको थियो ।
कोरोना परीक्षण गर्दा बिहीवार पोजेटिभ देखिएपछि सोही दिन नै उनलाई भरतपुर अस्पतालको आइसोलेसन लगिएको थियो । उनलाई श्वासप्रश्वासमा समस्यासँगै स्वास्थ्यमा थप जटिलता देखिएपछि शुक्रवार कोभिड–१९ आईसीयूमा सारीएको थियो। उनको त्यहीँ उपचारको क्रममा शनिवार बिहान मृत्यु भएको हो ।
सम्बन्धित वर्गका समाचारहरू
