भारतले सोमबार रातिदेखि मंगलबार साँझसम्म धौलीगंगा जलविद्युत परियोजनाको बाँध खोल्ने भएको छ । सोमबार राति १२ बजेदेखि १६ असार बेलुका पौने ७ बजेसम्म भारतको पिथौरागढ जिल्लामा रहेको धौलीगंगा जलविद्युत परियोजनाको बाँध खोलिने भएको हो ।

बाँधको सरसफाई गरिने भन्दै सूचना मार्फत् जानकारी दिईएको छ । एनएचपिसी लिमिटेड धौलीगंगा पावरस्टेसन धारचुलाबाट पत्र प्राप्त भएकाले नदी किनाराका बासिन्दालाई सतर्क रहन जिल्ला प्रशासन कार्यालय दार्चुलाका निमित्त प्रमुख जिल्ला अधिकारी टेकसिंह कुँवरले आग्रह गरे ।

कञ्चनपुर, दार्चुला, बैतडी, डडेल्धुरा भएर भारततिर बग्ने महाकालीमा पानीको बहाव र सतह बढ्ने भएकाले सो क्षेत्रका नागरिकलाई नदी छेउछाउमा गएर कुनै पनि क्रियाकलाप नगर्न र सतर्कता अपनाईराख्न समेत नेपाल र भारतका स्थानीय प्रशासनले अनुरोध गरेका छन् ।