कैलालीका दुई पत्रकारले ‘बार्गेनिङ’ गरेको अडियो बाहिरिएपछि फोन गर्ने गोविन्द विसीले आफुलाई हिमेश विकले भनेपछि फोन गरेको स्वीकार गरेका छन् । उनले विगत ८ महिनादेखि आफ्नो गाडी प्रयोग गरे बापतको भाडा माग्दा आफुले रकम लिनुपर्ने भन्दै त्यहाँ फोन गरेर लिन भनेको विसीको दाबी छ ।

नाईस टेलिभिजनका सुदूरपश्चिम ब्युरो प्रमुख हिमेश विक र नाईस टेलिभिजनमै आबद्ध गोविन्द विसीले ‘बार्गेनिङ’ गरेर असुल गरेको २५ हजार रकम फिर्ता गरिसकिएको छ । तर विसीले यसमा आफ्नो कुनै दोष नरहेको र सबै काम हिमेशकै निर्देशनमा गरेको स्वीकारोक्ती गरेका हुन् । 

दुई लाखमा ‘बार्गेनिङ’ गरेको र पछि एक लाख रुपैयाँ दिनुपर्ने भन्दै मेडिकल सञ्चालकलाई धम्की दिदै आएकोमा मेडिकल सञ्चालक सक्सेनाबाट थप ७५ हजार असुल्न धम्की दिएको टेलिफोन संवाद बाहिरिएको थियो । फोनमा रकम माग गर्ने विसीले यो घटनामा आफु निर्दोष रहेको भन्दै सञ्चार माध्यममा लिखित पत्र समेत पठाएका छन् । 

बार्गेनिङ गरेको आरोपमा लागेका गोविन्द विसीले लेखेको पत्र उनकै शब्दमा पढ्नुहोस् । 
आजभन्दा आठ नौ महिना पहिले मेरो से १ च ५५१  नम्बरको जीप  भाडाका लागि पत्रकार हिमेश विकलाई दिएको ठीक साँचो हो । म स्वयम् चालक बनेर पटक पटक सुदूरपश्चिमका विभिन्न जिल्लाहरुमा गएको पनि थिए । पत्रकार हिमेश विकले गाडीलाई मासिक पचास हजार दिने सर्तमा भाडामा लिएका थिए । पत्रकारिता गर्ने रहरका कारण केही कुराहरु सिक्ने अवसर पाउनुका साथै गाडीको मासिक भाडा बापतको रकम जिविकोपार्जनको माध्यम बनोस् भन्ने उद्देश्यले म पत्रकार हिमेश विकसँग    सहकार्य गर्दै अगाडी बढेको पनि हो ।   

लामो समयसम्म गाडी प्रयोग गर्दा मेरो गाडीको भाडाको रकम दिन बाँकी रहेकोले पटक पटक बैंकले किस्ताका लागि ताकेता गर्दै आएकोमा मैले हिमेश विकसँग भाडाको रकम माग्दै आएको थिए । मलाई तपाई आफै गएर मैले असुल्नुपर्ने रकम उठाएर गाडीको भाडा कटाउनुहोस भनेको अवस्थामा गौरीगंगा नगरपालीका चौमाला स्थित श्रीवास्तवक मेडिकलका सञ्चालक कमलेश सक्सेनालाई फोन गरेको साँचो हो ।

मैले हिमेश विकबाट पाउनुपर्ने रकम नपाउने अवस्था देखेर नै सक्सेनालाई फोन गरेको हो । यसमा मेरो बार्गेनिङ र अन्य फिरौती प्रयोजनका लागि पनि फोन गरेको होईन । न त मैले कसैलाई फोन मार्फत धम्की दिएको छु न त बार्गेनिङ नै गरेको छु । म त्यो बेला कुनै पनि पत्रपत्रिकासँग आबद्ध थिएन् । अहिले भने नाईस टीभिको रिर्पोटर रहेको छु । 

फोन वार्तालाई विभिन्न अनलाईन र पत्रिकामा मेरो सामाजिक जीवनमा ठेस पुग्ने गरी विषयवस्तुको गहिराईमा नपुगी फोनकै संवादलाई लिएर चरित्र हत्या गर्ने काम भएको छ । यसप्रति मेरो गम्भीर ध्यान आकर्षित भएको छ । घटनाको सत्यतथ्य पत्ता नलगाई एकतर्फी रूपमा अडियोको भरमा चरित्र हत्या गरिएको प्रति खेद प्रकट गर्दछु । 
 

हिमेशले ठगी र ‘बार्गेनिङ’ गरेका घटनाहरु बहिरिदैं 
नाईस टेलिभिजनका सुदूरपश्चिम ब्युरो प्रमुख हिमेश विकले गरेका ठगी र ‘बार्गेनिङ’ गरेका घटनाहरु एकपछि अर्को बहिरिदै गएका छन् । उनले समाचार प्रकाशन गरिदिने भन्दै धम्काउने, पैसा नभएको चेक दिने, उधारो खाएर भाग्ने, विभिन्न बहाना बनाएर ठगी गर्ने जस्ता घटनाहरु बाहिरिरहेका हुन् ।

केही समय आर्थिक दैनिकमा कार्यरत पत्रकार बिक यस्तै ‘बार्गेनिङ’ का घट्नाहरु बहिरिएपछि निष्कासन गरिएका थिए । यतिबेला भने आर्थिक ‘बार्गेनिङ’ र ठगी गरेका घटनाहरु एकपछि अर्को गर्दै बाहिरिएपछि समग्र पत्रकारिता जगत नै बद्नामित भएको भन्दै सञ्चारकर्मीहरुले सामाजिक सञ्जाल रंगाउँदै आएका छन् ।