धनगढीस्थित सेती प्रादेशिक अस्पतालमा कोरोनाको संक्रमणका कारण सोमबार एक महिलाको मृत्यु भएको छ । मृत्यु हुनेमा कञ्चनपुर जिल्लाको भिमदत्त नगरपालिका १८ की ५० वर्षीया महिला रहेकी छन् ।

अस्पतालका सूचना अधिकारी दिलिपकुमार श्रेष्ठका अनुसार ती महिलाको कोभिड अस्पतालमा राखेर उपचार भइरहेको थियो । उनको श्वासप्रश्वासमा समस्या देखिएको थयो ।

त्यस्तै सेतीमा पछिल्लो २४ घण्टामा १५५ नमुना परीक्षण गरिएकोमा २१ जनामा संक्रमण पुष्टि भएको सूचना अधिकारी श्रेष्ठले जानकारी दिए । यस्तै अस्पतालबाट ५ जना संक्रमित निको भएर घर फर्किएका छन् भने थप ३ जना भर्ना भएका छन् ।

हाल अस्पतालमा १८ जना संक्रमित उपचाररत रहेका छन् । जसमध्ये ४ जनाको आइसियूमा राखेर उपचार भइरहेको सूचना अधिकारी श्रेष्ठले बताए ।

Edit Ad