डोटीमा कोरोना खोप लगाएको अढाइ घण्टा पछि ६० वर्षीय वृद्धकाे मृत्यु भएको छ । शिखर नगरपालिका वडा नम्बर २ का लाल बहादुर बोगटीको मृत्यु भएको वडाध्यक्ष ऋषिराज जोशीले बताए ।

२६ दिन अघि भेरोसीलकाे पहिलो खोप लागेका बोगटीको सोमबार दोस्रो डोज खोप लगाएको अढाइ घण्टा पछि मृत्यु भएको हो । स्थानीय राम बहादुर कार्कीका अनुसार मुडेगाउँ खोप केन्द्रमा बिहान साढे आठ बजे खोप लगाएर आफ्नो घर फर्किएर निदाएका उनी बिहान ११ बजे मृत अवस्थामा भेटिएका हुन् ।

शिखर नगरपालिकाका स्वास्थ्य प्रमुख हरिस शाहले बोगटीको मृत्यु खोपको कारण नभएको बताए । दुई डोज खोप भएको सिसिबाट एक डोज बोगटी र दोस्रो डोज अर्को व्यक्तिलाई लगाएको र अर्को व्यक्तिमा कुनै समस्या नदेखिएका कारण खोपको कारण मृत्यु भएको भन्न नसकिने उनको भनाइ छ ।