कैलाली जिल्ला लिगको उपाधि विजय स्पोर्ट्स क्लबले जितेको छ । अखिल नेपाल फुटबल संघ (एन्फा) को वार्षिक कार्यक्रम अनुसार कैलाली जिल्ला फुटबल संघको आयोजनामा भएको कैलाली जिल्ला लिग फुटबल प्रतियोगिता २०७७÷०७८ को च्याम्पीयन बिजय स्पोर्ट्स क्लब बनेको हो ।
लिगको फाईनलमा साविक विजेता स्टार सिटी युवा क्लबलाई २–१ गोलको अन्तरले हराउँदै विजय स्पोर्टसले उपाधि उचालेको हो । लिगको उत्कृष्ट गोलरक्षक किपर स्टार सिटीका आकाश बुढा, उत्कृष्ट खेलाडी, डिफेन्स र उदयमान खेलाडी बिजय स्पोर्ट्स क्लबका हिरेन्द्र सिंह, चन्द्र बुढामगर, र सुशील बिक भए । फेयर प्लेको उपाधि धनगढी युवा क्लबले पायो ।
लिगको समापन समारोहमा उपमेयर कप राष्ट्रिय महिला लिग फुटबल प्रतियोगिताको च्याम्पियन बनेको धनगढी उपमहानगरपालिका महिला फुटबल टिमलाई सम्मान समेत गरिएको छ । कैलाली जिल्ला फुटबल संघका अध्यक्ष मोहित शाहले महिला लिग विजेता टोलीलाई सम्मान गरे ।
जिल्ला लिग फुटबल प्रतियोगिता २०७७÷०७८ बैशाख ०४ गतेदेखि सुरु भएर कोरोना महामारीका कारण बैशाख ९ गतेसम्म संचालनपछि रोकिएको थियो । लिगलाई फेरि पुस १० गतेदेखि संचालन गरिएको लिग संयोजक बिनोद बिष्ट बताए ।
लिगको नतिजापछि जिल्लाका १९ वटा क्लबलाई ए र बी डिभिजनमा विभाजन समेत गरिएको छ । उत्कृष्ट ८ मा परेका क्लबलहरु ए डिभिजनमा यथावत रहेका छन् भने ७ क्लब बी डिभिजनमा घटुवा भएका छन् । यस्तै प्रतियोगितामा सहभागी हुन नसकेका दुई क्लब र प्रतियोगिताका खेलहरुमा समयमै सहभागी बन्न नसकेका थप दुई गरी चार क्लब रेलिगेसनमा परेको कैलाली जिल्ला फुटबल संघले जनाएको छ ।
सम्बन्धित वर्गका समाचारहरू
