सुदूरपश्चिम प्रदेशको लागि अन्न भण्डार मानिने तराईमा किसानले रोपाइँ सुरु गरेका छन् । रोपाइँका लागि पर्याप्त हुने पानी नपर्दा पनि कैलाली, कञ्चनपुरका किसानले रोपाइँ सुरु गरेका हुन । यो प्रदेशमा अझै मनसुन आइपुगेको छैन । तर, ब्याड तयार भएपछि किसानले रोपाइँ गर्न थालेका छन् ।
कैलालीको पूर्वी क्षेत्रमा रानी जमरा कुलरिया सिँचाइ आयोजनाबाट केही खेती सिञ्चित हुने गरेको छ । तर, जिल्लाको अत्यधिक ठाउँमा सिँचाइ सुविधा छैन । त्यस्ता ठाउँका किसान बोरिङ वा आकाशे पानीको भरमा खेतीपातीको काम गर्दै आएका छन् ।
कैलालीको जानकी गाउँपालिकामा रोपाइँ गरिदैं । तस्बिरहरु: भोजराज भाट
सुदूरपश्चिमको पहाडी जिल्लामा भएको उत्पादनले त्यस क्षेत्रमा वर्षभरि खान पुग्दैन । ती जिल्लाहरुमा तराईबाट खाद्यान्न आयात गरिदैं आएको छ । त्यसैले पनि प्रदेश दुई जिल्ला कैलाली, कञ्चनपुरले खाद्य भण्डारको रुपमा लिइने गरिएको छ ।
यहाँको उत्पादनले प्रदेशकै पेट भर्ने कार्य हुने गरे पनि खेतीपातीको बेला जहिल्यै मल अभाव समस्या झेल्नु परिरहेको किसानको गुनासो छ । कतिपय किसानले ब्याड तयार भइसके पनि मलबिना रोपाइँ सुरु गर्न सकेका छैनन् । उनीहरु अझै पनि मलकै पर्खाइमा रहेका छन् । प्रादेशिक कृषि निर्देशनालयका अनुसार कैलाली, कञ्चनपुर दुवै जिल्लामा गरेर कुल एक लाख १८ हजार हेक्टर जमिनमा बर्खे धान खेती हुने गरेको छ ।
कैलालीको भर्री गाउँमा रोपाइँ सकेपछि हिलो खेलेर रमाइलो गर्दै । तस्बिर: छोटेलाल चौधरी
सम्बन्धित वर्गका समाचारहरू
