कञ्चनपुरको पुनर्वास नगरपालिका वडा नम्बर ५ मा आफ्नै छिमेकीले धारिलो हतियार प्रयोग गरी एक जनाको हत्या गरेका छन् । शनिबार राति १० बजे तिर ४७ वर्षीय गोपाल कुँवरलाई छिमेकी गोरे भनी चिनिने ४० वर्षीय गोरखबहादुर खड्काले घाँटीमा बन्चरो प्रहार गरी हत्या गरेको प्रहरीले जनाएको छ । 

छिमेकीहरुका अनुसार, कुँवर र खड्का बीच एकापसमा सामान्य विवाद हुँदा खड्काले बन्चरो प्रहार गरी हत्या गरेको खुलेको छ । घटनापछि आरोपित खड्का फरार रहेको र उनको खोजी कार्य जारी रहेको ईलाका प्रहरी कार्यालय त्रिभुवन वस्तीका प्रहरी निरीक्षक वकिलबहादुर सिंहको भनाइ छ ।

घटना बारे थप अनुसन्धान भइरहेको प्रहरीले जनाएको छ ।