कैलालीको धनगढीमा जारि लिटल फ्लावर प्रिमियर लिगको मंगलबार भएको प्रतियोगितामा घोडाघोडी क्रिकेट एकेडेमी र शुक्लाफांटा ब्ल्याकबक्स फाउन्डेसन विजयी भएका छन्। सुदूरपश्चिमाञ्चल एकेडेमी र खप्तड इन्डोर स्पोर्ट्स ट्रेनिंग सेन्टरलाई पराजित गर्दै घोडाघोडी र शुक्लाफाँटा विजयी भएको हो। समुह ‘सी’ अन्तर्गतको पहिलो खेलमा कैलालीको घोडाघोडी क्रिकेट एकेडेमीले सुदूरपश्चिमाञ्चल एकेडेमीलाई चार विकेटले पराजित गर्दै विजयी सुरुवात गर्यो। प्रतियोगितामा सुदूरपस्चिमान्चलको यो दोश्रो हार हो।
सुदूरपश्चिमाञ्चलले दिएको १११ रनको लक्ष्य घोडाघोडीले १६. ५ ओभरमा ६ विकेट गुमाएर पुरा गर्यो। घोडाघोडीको ब्याटिंगमा ओपनर बिपिन बिक्रम शाहीले सर्वाधिक ३१ रन योगदान दिए। सन्जय बोहराले २२ तथा कृष कार्कीले २० रन बनाए। ८१ रनमा ६ विकेट गुमेको अवस्थामा सन्जय र कृषले अविजित ३२ रनको साझेदारी गर्दै जितसम्म पुर्याए।
सुदूरपश्चिमाञ्चलको बलिंगमा बिरेन्द्र चन्द र पारस सुनारले २र२ तथा सौर्य श्रेष्ठ र निसान रेग्मीले १/१ विकेट लिए। यसअघि टस जितेर ब्याटिंग गरेको सुदूरपश्चिमाञ्चल एकेडेमीले १८.५ ओभरमा ११० रनमा सबै विकेट गुमायो। सुदूरपश्चिमाञ्चलको लागि आशिष लुहारले सर्वाधिक ४२ रन योगदान दिए जुन क्रममा उनले ३६ बलमा १ चौका र ४ छक्का प्रहार गरे। सन्दिप बिस्टले २७ तथा किरण कार्कीले १४ रन बनाए।
घोडाघोडी क्रिकेट एकेडेमीका हरिश बस्नेत एक्लैले ४ विकेट लिए जुन क्रममा ४ ओभरमा २२ रन खर्चिए। यस्तै संजय बोहराले ३ विकेट लिए भने कृष कार्कीले २ तथा भुपेश जोशीले १ विकेट लिए। खेलको प्लेयर अफ द म्याच अलराउण्ड योगदान दिएका संजय बोहरा घोषित भए। दोश्रो खेलमा समुह ‘ए’ अन्तर्गत शुक्लाफांटा ब्ल्याकबक्स फाउन्डेसनले विजयी सुरुवात गर्ने क्रममा खप्तड इन्डोर स्पोर्ट्स ट्रेनिंग सेन्टरलाई ११२ रनको विशाल अन्तरले पराजित गरेको छ।
शुक्लाफांटाले दिएको १७७ रनको लक्ष्य पछ्याएको खप्तड इन्डोरले १५.१ ओभरमा ६४ रन मात्र बनायो। खप्तडको लागि पुकार चन्दले १३ तथा प्रकाश पाण्डेले १२ रन बनाउनु बाहेक अन्य ब्याटरले दोहोरो अंकमा रन बनाउन सकेनन्। खप्तडलाई सस्तोमा सिमित गर्न शुक्लाफांटाका दायाँ हाते पेसर कैलाश ऐर एक्लैले ५ विकेट लिए। प्लेयर अफ द म्याच घोषित ऐरले ३.१ ओभरमा १५ रन खर्चिए। सुशील रावल, भरत चन्द, बसन्त खत्री र सुरज तिरुवाले १र१ विकेट लिए। यसअघि टस हारेर ब्याटिंग गरेको शुक्लाफांटा ब्ल्याकबक्स फाउन्डेसनले २० ओभरमा ९ विकेट गुमाएर १७६ रन बनायो।
शुक्लाफांटाको लागि ओपनर अशोक बिस्टले सर्वाधिक ४१ रन योगदान दिए जुनक्रममा उनले ३५ बलमा ६ चौका प्रहार गरे। किरान ठगुन्नाले २२ बलमा ४ चौका र २ छक्का मद्दतले ३५ रन बनाए। बसन्त खत्रीले २३ तथा लोकेश जोशीले २० रन बनाए। खप्तड इन्डोर स्पोर्ट्सको बलिंगमा रवी बिस्टले सर्वाधिक ३ विकेट लिए जुन क्रममा ३ ओभरमा २१ रन खर्चिए। प्रकाश पाण्डेले २ तथा मुकेश बिस्ट, नगेन्द्र उपाध्याय र दिपक टमाटाले १र१ विकेट लिए। प्रतियोगिता अन्तर्गत चौंथो दिन पनि दुई खेल हुनेछन्। पहिलो खेल विहान ९ बजे आयोजक लिटल फ्लावर र घोडाघोडी क्रिकेट एकेडेमी बीच तथा दोश्रो खेल १ बजे कैलाली जिल्ला क्रिकेट क्लब र खप्तड इन्डोर स्पोर्ट्स ट्रेनिंग सेन्टर बीच हुनेछ।
सम्बन्धित वर्गका समाचारहरू
