काठमाडौं । धनगढी एफसी नेपाल सुपर लिग एनएसएलको शीर्ष स्थानमा उक्लेको छ । बिहीबार भएको खेलमा चितवनलाई १–० गोल अन्तरले हराउँदै धनगढी शीर्ष स्थानमा उक्लेको हो । 

त्रिपुरेश्वरस्थित दशरथ रंगशालामा भएको खेलमा धनगढीलाई जित दिलाउन ओलावाले अफिजले निर्णायक गोल गरे । ओलावालले खेलको दोस्रो मिनेटमा गोल गर्दै धनगढीलाई जित दिलाएका हुन् । पहिलो हाफको इन्जुरी समयमा चितवनले बराबरी गर्ने अवसर पाएको थियो । 

तर, चितवनका विमल धर्तीमगरले पेनाल्टी मिस गर्न पुगे । दोस्रो हाफमा दुबै टोलीले गोल गर्न नसक्दा धनगढीले जित निकालेको हो । जितसँगै धनगढी शीर्ष स्थानमा उक्लेको छ । धनगढीको ५ खेलबाट ११ अंक छ ।  दोस्रो स्थानमा रहेको ललितपुर सिटीको ५ खेलबाटै ९ अंक छ । पराजित चितवन पुछारबाट दोस्रो स्थानमा छ ।