नेपाल सुपर लिग एनएसएल अन्तर्गत आज काठमाडौँ रेजर्स एफसी र धनगढी एफसीबीच खेल हुँदैछ। आइतवारका लागि तय भएको काठमाडौँ र धनगढीबीचको खेल त्रिभुवन विश्वविद्यालयको दिक्षान्त समारोहका कारण आजका लागि सारिएको हो। खेल आज साँझ दशरथ रङ्गशालामा ६ बजे सुरु हुनेछ।

दशरथ रङ्गशालामा आज त्रिभुवन विश्वविद्यालयको दिक्षान्त समारोह समापन भएपश्चात ६ बजेबाट खेल सुरु हुने एनएसएल व्यवस्थापन समितिले जनाएको छ। शिर्ष स्थानमा रहेको धनगढी र चौथो स्थानमा रहेको काठमाडौँ आजको खेलमा जित हात पार्दै आफ्नो प्ले अफको यात्रालाई सहज बनाउन चाहन्छ। यस्तै आजका लागि तय भएको सर्पोटिङ्ग इलाम एफसी र ललितपुर सिटी एफसी बीचको खेल भोलि दिउँसो १ बजेबाट हुनेछ।