बझाङको जयपृथ्वी नगरपालिका ७, सुवेडाको चौपाखे भन्ने ठाउँमा आइतबार दिउँसो पहिरो जाँदा एक जनाको मृत्यु भएको छ । एक जना घाइते भएका छन् । पहिरोमा सोही वडाका कर्मराज जोशीका १२ वर्षीय छोरा शिवराजको मृत्यु भएको हो । उनको जिल्ला अस्पताल बझाङमा उपचारको क्रममा मृत्यु भएको थियो ।

घाइते भएका अर्का स्थानीय जनेश्वर जोशीको उपचार भइरहेको छ । पहिरोमा पुरिएर शिवराज जोशीको एउटा भैंसी पनि मरेको छ । मृतक बालक पहिरो आएको बेला गोठभित्र बसिरहेको जिल्ला प्रहरी कार्यालयका प्रहरी निरीक्षक लोकेन्द्रसिं कार्कीले बताए ।

शनिबार बिहान पनि केदारस्युँ गाउँपालिका ८, मल्लेसीमा पहिरो जाँदा ६ जनाले ज्यान गुमाएका थिए । एक जना अझै बेपत्ता छन् । पहिरोले १८ घर बगाएको थियो ।