बुधवार पेन्सन बुझ्न भारत पुगेका बैतडीका एक नागरिकको मृत्यु भएको छ । मृत्यु हुनेमा दशरथचन्द नगरपालिका ८ त्रिपुराका ८३ वर्षीय धनसिंह रावल रहेका छन ।

पेन्सन लिन भारतको झुलाघाटको बैंकमा लाइन बसेका बेला एक्कासी ढलेका रावलको उपचारको लागि ल्याइदैं गर्दा मृत्यु भएको बैतडीका प्रहरी नायव उपरीक्षक नारायणप्रसाद अधिकारी बताए । उनका अनुसार मृतक रावल लामो समयदेखि दम र श्वास प्रश्वासका रोगी रहेका थिए ।

रावलको कोरोना परीक्षण गर्न परिवारले नमानेकोले स्वाब संकलन नगरिने प्रहरी नायव उपरिक्षक अधिकारीले बताए । मृतकको शव परिवारको जिम्मा लगाइएको छ । मृतक रावल भारतीय सेनाबाट सेवा निवृत्त भएका थिए ।