नेपाल प्रिमियर लिग एनपिएल को फ्रेन्चाइज टोली सुदूरपश्चिम रोयल्सका मार्की खेलाडी दीपेन्द्रसिंह ऐरीले बलिङ राम्रो गरे टोलीले उपाधि जित्न सक्ने प्रतिक्रिया दिएका छन् ।
आसन्न एनपिएलका लागि दीपेन्द्रले टोलीको बलियो पक्ष र सुधार गर्नुपर्ने कुराहरुका बारेमा बोलेका हुन् । ‘हाम्रो बलियो पक्ष भनेको ब्याटिङ हो । हामीले चार जना विदेशी खेलाडी अनुबन्ध गरेका छौं । सबै अलराउन्डर हुन्,’ दीपेन्द्रले बताए, ‘यदि यी विदेशी खेलाडीबाट राम्रो बलिङ प्रदर्शन हुने हो भने हामीले एनपिएलको उपाधि जित्न सक्छौं ।’
सुदूरपश्चिमले एनपिएलका लागि स्कट्ल्यान्डका ब्रेन्डन म्याकमुलेन, इङ्ल्यान्डका सेइफ जयब, न्युजिल्यान्डका स्कट कुगुलेजीन र युएईका रोहन मुस्ताफालाई अनुबन्ध गरेको छ ।
जगत टमाटा मुख्य प्रशिक्षक रहेको सुदूरपश्चिममा आरिफ शेख र अभिनास बोहोरा हेर्नलायक घरेलु खेलाडी हुन् । सुदूरपश्चिमको आइकनिक खेलाडीमा बसन्त खत्री छन् ।
सुदूरपश्चिमले मंसिर १८ गते विराटनगर किङ्ससँग प्रतिस्पर्धा गर्दै प्रतियोगिताको सुरुआत गर्नेछ ।
सम्बन्धित वर्गका समाचारहरू
